🗊Презентация Параллель және перпендикулярлы жазықтықтардың ерекшеліктері мен қасиеттері

Оқу мақсаты: 11.3.2.4. параллель және перпендикуляр жазықтықтардың белгілері мен қасиеттерін біледі және қолданады;

Екі жазықтықтың кеңістікте өзара орналасуларының екі жағдайы болуы мүмкін: 1. Екі жазықтықтың ортақ нүктесі бар. Сонда екі жазықтықтың қиылысуы аксиомасы бойынша олардың ортақ түзуі бар. Мұндай жазықтықтар қиылысушы деп аталады. 2. Екі жазықтықтың ортақ нүктесі жоқ.

Жазықтықтардың параллельдік белгілері. 1. Егер бір жазықтықтың қиылысатын екі түзуінің әрқайсысы басқа жазықтыққа параллель болса, онда бұл жазықтықтар параллель. 2. Егер бір жазықтықта жатқан қиылысатын екі түзу екінші жазықтықта жатқан екі түзуге сәйкесінше параллель болса, онда ол екі жазықтық параллель болады.

Параллель жазықтықтардың қасиеттері. 1. Егер параллель екі жазықтықты үшінші жазықтық қиятын болса, онда қиылысу түзулері параллель болады. 2. Егер түзу параллель жазықтықтардың біреуін қиятын болса, онда ол екінші жазықтықты да қияды. 3. Егер жазықтық параллель жазықтықтардың біреуін қиятын болса, онда ол екінші жазықтықты да қияды. 4. Берілген жазықтықта жатпайтын нүкте арқылы оған параллель жазықтық жүргізуге болады және ол тек біреу ғана. 5. Үшінші бір жазықтыққа параллель екі жазықтық өзара параллель. 6. Параллель жазықтықтардың арасындағы параллель түзулердің кесінділері тең болады. 7. Егер түзу екі параллель жазықтықтардың біріне перпендикуляр болса, онда ол екінші жазықтыққа да перпендикуляр болады.

Тапсырма 1. ABCDA1B1C1D1 кубында A1D1 қырының ортасы К нүктесі арқылы A1C1D жазықтығына параллель қима жүргізу керек.

Тапсырма 2. РABCDE бесбұрышты пирамидасының ABCDE табанының ішкі М нүктесі арқылы РАВ жағына параллель өтетін α қимасын салыңыз.

А деңгейі. В нүктесі АЕС үшбұрыш жазықтығында жатпайды, М, К және Р нүктелері – сәйкесінше АВ, ВС және ВЕ кесінділерінің орталары. а) МКР және АЕС жазықтықтары параллель екенін дәлелдеңіз. б) АЕС үшбұрышының ауданы 48 см2 болса, МКР үшбұрышының ауданын табыңыз.

В деңгейі.ABCDA1B1C1D1 параллелепипедінде A1DB жазықтығы D1CB1 жазықтығына параллель екенін дәлелдеңіз.

С деңгейі.DF түзуі α, β және γ жазықтықтарын сәйкесінше D, E және F нүктелерінде қияды және DF=3, EF=9. EG түзуі α және γ жазықтықтарын сәйкесінше G және H нүктелерінде қиып өтеді және EG=12. GH ұзындығын табыңыз.

Жазықтықтардың перпендикулярлық белгілері. Егер екі жазықтықтың біреуі екіншісіне перпендикуляр түзу арқылы өтетін болса, онда бұл жазықтықтар перпендикуляр болады. Салдар: 1. Егер жазықтықтың басқа жазықтыққа перпендикуляр ең болмағанда бір түзуі бар болса, онда ол жазықтықтар өзара перпендикуляр. 2. Егер жазықтық берілген екі жазықтықтың қиылысу түзуіне перпендикуляр болса, онда бұл жазықтық берілген екі жазықтықтардың әрқайсысына перпендикуляр болады.

Перпендикуляр жазықтықтардың қасиеттері: 1. Егер түзу өзара перпендикуляр екі жазықтықтың бірінде жатса және олардың қиылысу түзуіне перпендикуляр болса, онда бұл түзу басқа жазықтыққа да перпендикуляр. 2. Егер өзара перпендикуляр екі жазықтықтың біреуіне тиісті нүкте арқылы өтетін түзу екінші жазықтыққа перпендикуляр болса, онда ол бірінші жазықтықта жатады. 3. Егер үшінші жазықтыққа перпендикуляр екі жазықтық қиылысатын болса, онда олардың қиылысу түзуі үшінші жазықтыққа перпендикуляр болады.

Берілген жазықтыққа перпендикуляр түзуді осы жазықтыққа нормаль деп атайды. Қиылысушы екі жазықтықтың арасындағы бұрыштың шамасы осы жазықтықтардың нормальдары арасындағы бұрышқа тең.

А деңгейі.АВС үшбұрышының АВ және ВС қабырғалары орталары арқылы осы қабырғаларға перпендикуляр α және β жазықтықтары жүргізілген. М нүктесі α және β жазықтықтарының қиылысу түзуіне тиісті. М нүктесі АВС үшбұрышының төбелерінен бірдей қашықтықта екенін дәлелдеңіз.

В деңгейі.РАВС дұрыс тетраэдрінде К нүктесі – ВС қабырғасының ортасы, D нүктесі – АР қабырғасының ортасы. Келесі жазықтықтардың өзара перпендикуляр екенін дәлелдеңіз: а) АКР және ВСР; б) АКР және ВСD.